Khwahishein hain chhoti si !

Khwahishein hain chhoti si, puri toh kar lene do !

Jitni ho sake haathon mein, yeh reth bhar lene do !!

 

Dheere dheere ungliyon ke beech se nikal jati hai,

Jitni koshish karta hoon, utna hi phisal jati hai,

Thodi hi sahi, per yeh mutthi toh bhar lene do !

Khwahishein hain chhoti si puri toh kar lene do !!

 

Nanhe se sapne hain per pure nahi samaate hain,

Adhoore se dikhte hain, adhoore hi reh jaate hain,

In sapnon ke liye aankhon mein, aansoo toh bhar lene do !

Khwahishein hain chhoti si puri toh kar lene do !!

 

Har pal kushi se jeene ki koshish kiya karte hain,

Zindagi ke mushqil imtihaanon se per darte hain,

Ik baar akele ladne ki himmat toh kar lene do !

Khwahishein hain chhoti si puri toh kar lene do !!

 

Ik duje ki khushi mein apni khushi mil jati hai,

Baaton toh gham ki takleef bhi kam ho jati hai,

Ghut ghut ke jeeye ab tak, ab dil khol ke toh mar lene do !
Khwahishein hain chhoti si puri toh kar lene do !

Jitni ho sake haathon mein ye reth bhar lene do !!